Mat 20 | ASO | STEP | Ido' Okulumoku' minive'mo gelekele' i-daa' avelo' gizebo ogo gono dado' meni ngemeline' monovomu' nene ne'mino lo molo lo-lengemelove: Gamene ma nedenga' go' lavo ve ma misubo've naba minive'mo oto vaini mi'veu' gono dalizavemu' viseto' monine'.

Matthew 20

Vaini Mingu' Gono Daa' Avelo' Lo Molo Izesu' Aneza Gamazi Line'

1 Ido' Okulumoku' minive'mo gelekele' i-daa' avelo' gizebo ogo gono dado' meni ngemeline' monovomu' nene ne'mino lo molo lo-lengemelove: Gamene ma nedenga' go' lavo ve ma misubo've naba minive'mo oto vaini mi'veu' gono dalizavemu' viseto' monine'. 2 Mono evene' ma ningo mi'neu' gono dalizangumu' nene gamene hamo hamoto' tu (2) kina tu (2) kina lengemelove lavo lamine've likevo mi'vela ngimiselavo vi gono di minani'. 3 Ido' gono di nizavo ho' dizo naeni (9) kiloku ne'mine ogavo mine meleho vo evene' gohi ma maketi ebeku' haza nizavo ningo ti' lo lo-ngimine': 4 Linginesi vi mi'neu' gono dalo. Vi dikevo meni a'mido' lisihe' iline' nene lengemelesuve. 5 Ne'mine lavo vi gono di minani'. Ido' ingine gono di nizavo mine meleho holise' gamene tuvelu (12) kiloku ne'minelokisi ido' tili (3) kiloku ne'minelokisi gohi vo evene' gohi ma ningo a'mine'mine ogo gono'velo' ngimiselavo vani'. 6 Vi gono di nizavo nivenga' molalosa faef (5) kiloku ne'mine ogavo ihe' vo evene' gohi ma minani' nene ningo ti' lo lo-ngimine': Lingine nedengati' gono dami haza mini'mi vi idise nivenga' molalosa neidokisi haza nizani' nene nanimu' nave. 7 Ne'mine lavo ingine ti' li li-imani': Evene' ma gono ma limamanako ne'mo haza none. Ne'mine likevo aza ti' lo lo-ngimine': Linginesi mi'neu' vi gono dalo. 8 Lavo vi gono dikevo nivenga' molo sigisi (6) kiloku ogavo mine meleho gusikusi've ti' lo lo-imine': Gonolo' ve asi lo-ngemezo. Gono huli ikevo meni ngemelinge. Gono alinge' dave nene gomu' ngemo a'midoti' a'midoti' dave ngemeka' ngemeka' ogo gomu' dave alinge' ngemelesane. 9 Ne'mine lavo ne'mine ogo neivo faef (5) kiloku ne'minelo' api' igi gono dave ikevo tu (2) kina tu (2) kina ngemavo dani'. 10 Ido' neloti' gono gomu' dave igi ingine aza tu (2) kina tu (2) kina lemosa a'mido' gohi ma imine' molo lemelihe li gilani'za ne'mine amo tu (2) kina tu (2) kina nene ngemavo a'minevo' dani'. 11 A'minevo' di mine melehine elemi ti' li lani': 12 Holi'mo amuzo molo nolivo gohise helo gono naba dovo' dovo' ogo minunive meni lemo gono ngomovo' dave ngivile' ogosa meni naba lemelinako gaza engikisi lelikisi do lisihe' ogo hamo' votigilelo' meni lemane. 13 Ne'mine li elemani'za aza mine meleho engikuti' ve mamu' ti' lo lo-imine': Zogone ve, naza monovo goloso o-gedamuve. Gono dalinido' tu (2) kina gemelove lokuvo gaza lamine' ve lanivo gamazite do hamo' ogo lusido' mo gimuvoni' nenako 14 a'mine menika nene dosa vozo. Gei' gimuvoni' ne'mine alinge' igi gono davesi hamo' meni ngemelesuve lo gele nouve. 15 Ido' neni' moni'nedunu' olosa giluvoni' inite' nene neni' lu'nelo' oga' nene ha neive. Naza evene' ma do lamine' o-ngiduvoni' nemu' nene gei' lukehe nebelelinido' o neihe line'. 16 Ne'mine lo Izesu' ti' lo line': Ido' a'mine'mine igi gomu' milaa' nave ingine nene mine alinge' ilisave ido' alinge' milaa' nave ingine nene gomu' milalisave.

Izesu' Helelingumu' Gohi Ma Lo-ngimivo Ne'mo Gamene Sitohamo Ine'

(Maleko' 10:32-34; Luka')

17 Ido' Izesu' aza Zelusalemi numuno ebeta dizelesa izipahala zuho tuvelu nene ngele'mizo novo ngele'mize abaza' ogo akalo' nivangu' ti' lo lo-ngimine': 18 Gililo. Laza nene Zelusalemi numuno ebeta dizo novune. A'mida nene O'mosolati' ve gihile neni' nene eveneto' medeli mini O'moso inite' lehizi-daa' ave nabasi ido' avotemote mono' lani' apizi ngimaa' avesi engi' a'ningu' milikevo ingine goni' i-nidi lihimeka apaso helelinido' o neive li 19 Zuda ve minamani' heta ato' aleveti a'ningu' mili-nidikevo ingine gize zohi' i-nidi gasavasi nalatunu' nene mehe'ne izivi' ledivi' igi lohoto' zalo' nibili hililisave. Ne'mine ikevo helo galeseu' lemo gamene sitohamo minekuvo O'moso'mo do ote-nedeleseive lo line'.

Zakoboki Zohaneki Longo' Asine' Initekumu' Lo-ngimine' Gamazi

(Maleko' 10:35-45)

20 Neloti' nene Zebedaio' gipele sitalitisi ize'nibo ne'mo a'mine gipele sita' nene ngele'mizo Izesuda ogo gubi' ize emo opo'ni lo inite' ma ilive lo lo-imine'. 21 Ne'mine ogavo Izesu' ti' lo longo' o-do line': Gaza nadi' olongumu' nolane. Lavo ti' lo lo-imine': Gaza alinge' Guvekasi ve lolo' ogo evene' gizebo o-ngedo mineline' gameneu' nene nei' gipe'ne sita' mene gezeloti' limi evene' lingesi ma ngivile' igi guve'inesi ve lili' igi mini anga zamelasi adavalasi minilisive lo gele nemeline losa gele nouve. 22 Ne'mine lavo Izesu' ti' lo lo-ngimine': Lingine longo' i-nidasine' initeli'mi monovo nene gilami gopo likeve. Inite' goloso i-nidilizani' nene ekese' noso ne'mino nenako a'mine i-nidilizani' inite' nene ha gehelesa nouve. Ido' linginesi neni' geheloni' inite' ekese' noso ne'mino minine' nene ha gihilisido' i nizasihe. Ne'mine lavo ti' li lasine': Ee, laza ne'mine ha olosido' o nosive. 23 Likesivo aza lo-ngimine': Lamine' lingine neni' geheloni' mulumo geni nene gihilisine'za zamelasi adavalasi minaa' mo'mosi' nene neni' inite' neivosa lengemelohe. Me'neho dalisive lo do va'va' o-ngidive nene engikovo' nene dalisasive. 24 Ido' uvolohoi akunoloi ne'mine asine' nemu' izipahala zuho linge teni nene gilii engikumu' nene mulu'ningu' goloso ine'za 25 Izesu' aza a'mine zuho asi lo-ngemavo ezela ikevo ti' lo lo-ngimine': O'moso'mi zuho minamani' heta ato' ve engi' gizebo ve'ine evene'ine nene gelekele' i-ngidilizave li amuzo mili li-ngidaa' nave. A'mine evene' engita evene' naba minave nete nene a'mine evene'ine zuho nene ngivile' igi amuzo ve goloso minisa gizebo i-ngidaa' nave. Ne'mine iga' nani' nemu' nene lingine mo gili nizani'za 26 lengi' muliseu' nene ingine iga' nani' ne'mine nene amilisave. Lengikuti' ve mali'mo guve'nesi ve lolo' olove lo gelo ma aza nene lengi' gelekele' vetine ne'mine lolo' ogo mineleseive. 27 Ee, ve ma aza gomu' molo lengemo evene' naba minelove lo gelo ma lengi' goboni izipetine ne'mine lolo' ogo mineleseive. 28 Ee, a'mine ve aza O'mosolati' ve gihile oga' nouvoni' ne'mine oloseive. Naza evene' gelekele' i-nidi nele'mizi lamine' ilizave losa lemamuve. Asi gelekele' o-ngedo ngele'mize lamine' olosa ogo evene' muki' nene meni hizo do ngu' izo do tine' molo-ngedelove lo engikumu' oko'ne hulo helelesa limuvoni' ve line'.

Izesu' Ve'ine Goloso O Vive Sita' Ma Do Lamine' O-ngidine' Gamazi

(Maleko' 10:46-52; Luka'18:35-43)

29 Ido' Izesu' aza izipahala zuho ngele'mizo vo Zeliko ebe' hulo novivo evene' muki' goloso e'meti vani'. 30 Ne'mine navo ve'ine likive sita' aka gahevela mini Izesu' ogo volosa nave li-ngimikevo gili asi naba li ti' li lasine': Guvelesi ve naba Davidi' a'vo ezelo' medelo minanive make, gaza leli' mulumote ningevo. 31 Nilasivo evene' muki' nene gamazi hulilisive li ngelemani'za ingine gohi amuzo mili asi lasine': Guvekasi ve, Davidi' a'vo make, leli' mulumote ningevo. 32 Ne'mine li nilasivo gelo Izesu' aza akalo' minido' ha mino asi lo-ngemavo ikesivo ti' lo lo-ngimine': Lingine nadi' o-lengedelove lisa nigilasive. 33 Ne'mine lavo ingine ti' li lasine': Guvekasi ve, vete do lamine' o-ledanivo vete gohi ningelosive losa nolusive. 34 Likesivo Izesu' aza muluno hukavo ve'nido' do gelavo a'mido' lite' lo ve'ine lamine' ogavo ve'ine gohi ningi e'meti vasine'.